اقلب الصفحه القديمه..
ماعدش ليها عندى قيمه..
اتقرا كل اللى فيها..
ونصها مشطوب عليها..

ماعدش فيها حاجه تنفع..
كل اللى فيها حاجات بتخدع..
اقلب الصفحه القديمه..

ماتستاهلش نبص بصه..
تخاريف وليه نعملها قصه..
حبه كلام وأمور جنان..
زى اليفط فوق الحيطان..

حاجات ممله لوقت فاضى..
وكان لها عمر أفتراضى..
خلص بقا وكان بالتراضى..
قفلنا على كل ماضى..

اقلب الصفحه القديمه..
واطلع لنا بحبة دروس..
اصل العلام مش بالفلوس..
ولا يوم ح يثبت فى الرؤوس..
مدام ماهيش صافيه النفوس..

اقلب الصفحه القديمه..
ماتخفش على نفسك ح تعرف..
تختار لنفسك حاجه اظرف..
الصفحه ديه ماتنفعكش..
كل اللى فيها مايلزمكش..

مش هيه دى اللى تموتك..
ولا يوم تضيع قوتك..
وكل حاجه فيك سليمه..
ذكى وافكارك عظيمه..

اقلب بقا الصفحه القديمه..
ماعدش ليك ولا ليها قيمه