رافضك يا زمانى ... يا أوانى ... يا مكانى
أنا عايز أعيش فى كوكب تانى
فيه عالم تانى... فيه لسه أمانى

فيه الإنسان لسه إنسان .... عايش للتانى

عالم تيارو رياحه قوية بتهد كيانى تكسر فيا
من غير مواعيد .. بتاخدنى بعيد

عن معنى حياتى..عن أصلى و ذاتى
وده موش بإيديا
فيه سد منيع...عالى و فظيع

بينى و بين نفسى...بين روحى و رسمى
بين يومى و أمسى
و اللى اتمنيته و بنيته فى الهوا بيضيع
و ده موش بإيديا
مكبوتة فى قلبى أحلام محسورة
و حطام أفكار أيتام مبتورة
و آمال مطوية...بتعافر فيا
و كأن أوانى كان لسه شوية
و فى وسط الناس و الزحمة
تاه الإحساس و الرحمة
راح منى سلامى...تاه حتى كلامى
ضاق بيا مكانى....كداب يا زمانى